تصاویر منتخب

ye doost نظرات یکشنبه 11 شهریور 1397 ، 04:05 ب.ظ
وداع حضرت امام حسین (علیه السلام)

کربلا دشتنینده عاشورا گونی

آز قالیردی باتماقا زهرا گونی

حق وباطل اوسته باشلاندی جدل

کربلا اولدی گلستان ما حصل

کسدیلر اعدا خیامین دوره سین

داندیلا مهر و محبت سوره سین

بیر طرف یئتمیش نفر آزاده خو

بیر طرف سایسیز سپاهیله عدو

الده هر کیمسه شهادت نامه سی

ایچدی بزم وصلیده قان باده سی

کئچدی باش و جانیدن آزاده لر

جان وئروب دلدارینه دلداده لر

کربلا دشتی اولوب کوه منا

تشنه لبلر ایچدیلر آب بقا

جانینی تقدیم ائدیب پیر و جوان

قالدی یالقیز سرور آزادگان

یکه تاز عرصه یوم الست

باده قالو بلی دن مست مست

ظاهر اولدی وعدگاه وصل یار

قالمادی هجرانه قلبینده قرار

هر نقدری سسلدی هل من معین

تیریله وردی جوابین قوم کین

گلدی اخیامه او شاه تشنه کام

اهلبیتی سسلدی منی سلام

خیمه ده اهل حرم خرد و کبار

آلدی شاهین دوره سین پروانه وار

وردییلر بیر سس سسه آغلاشدیلار

قالمادی بیر کیسمه ده صبر و قرار

بیر به بیر آلدی قوجاقه قیزلاری

آسمان عصمته اولدوزلاری

زینب صدیقه زهرایه نشان

گوردی قارداش آیریلر ائتدی فغان

سسلدی قربان اولوم گئتمه اخا

بیر دایان زینب سنه اولسون فدا

گئتمه میش بو قورخلی میدانه تک

بیر دولانیم باشیوه پروانه تک

شاعر : محمد هوشمند
ye doost نظرات یکشنبه 11 شهریور 1397 ، 03:56 ب.ظ
وداع حضرت امام حسین (علیه السلام)

سزادور عشقیلن من باش وئرم شمشیر فولاده

ولی باش اگمرم جبریله قوم ظلم و بیداده

بو قانین وار نیازی سنله بیر کوبنده فریاده

بو گون معشوقیله عاشق گرک همرنگ اولا زینب

منی سرمست ایدن ساقی ازل گون جام وحدتدن

سنی سیراب ائدیب سرچشمه عشق و محبتدن

حدف تک بیرجه عشق الله دور باجی بو نهضتدن

دایانام من بیر عالم گر سپاه و هنگ اولا زینب

اونا دلبند اولان اهل و عیاله پایبند اولماز

دچار یار اولان عاشق اسیر هیچ کمند اولماز

باجی عشق حقیقی عالمینده چون و چند اولماز

دگور شایسته عشقین اهلینه دلتنگ اولا زینب

دولوبدور گلستان کربلا سرو و صنوبردن

بیتیبدور لاله و نسرین و نرگس خون اصغردن

گلور عشقین شمیمی قاسم و عباس و اکبردن

بو باغین گوللری لازمدی رنگارنگ اولا زینب

بلی سویلر بلایه ، لا دئمز شوریده سر عاشق

باش اگمز ذلتیله دشمنه باشدان کچر عاشق

وئرر جانانینه جانین ، شیرین بیر سود امر عاشق

هامی عشق اهلینه تا بو عمل فرهنگ اولا زینب

عواطف عاشقه مانع اولانماز طی راهیندن

تجلا گر جمال یار اولا تنها نگاهیندن

عبودیتدن اولسون تا علامت سجده گاهیندن

گرگ آنندا عبدین بیر نشان سنگ اولا زینب

بو گون گرچه گئدوب الدن ابوالفضل علمداریم

باتوبدور قانه یتمیش بیر نفر یار وفاداریم

شهید اولسامدا چون تاریخیده محو اولماز افکاریم

هراسیم یوخ بوتون دنیا مصاف جنگ اولا زینب

گرک هموار ائده عاشق طریق عشقی قانیله

آلا وصلین متاعین بی محابا نقد جانیله

وصاله یول تاپا ترک عیال و خانمانیله

صبور اول قویما عشقین کاروانی لنگ اولا زینب

سئنا پیمانه جان لیک سنماز عهد و پیمانیم

گوتوررم من حجاب اولسا اگر جانانیمه جانیم

ئوره ک آئینه سین صیقل وئرر باشدان آخان قانیم

گورنمز دل اگر آئینه سینده زنگ اولا زینب

شاعر : استاد قاسمپور
ye doost نظرات شنبه 10 شهریور 1397 ، 04:52 ب.ظ
امان نامه

عصر تاسوعا قریب شام عاشورائیدی

چخدی لشکردن کناره شمر شوم نابکار

یوز دوتوب سمت سپاه شاه دینه دادیله

سسلدی أَینَ بنو أُختی؟ سوزون ایتدی کرار

بولدی شمرین مقصدین پور رشید مرتضی

باشینی سالدی اشاقه با کمال انکسار

شاه دین یوز دوتدی عبّاسه بویوردی یا أَخا

شمر ذی الجوشن سیزی سسلور گورون نه قصدی وار؟

ایلدی عبّاس فوراً امر شاهه امتثال

خارج اولدی خیمه لردن مرتضایه یادگار

یوز دوتوب اکراهیله شمره دئدی قصدون ندی؟

وئردی عبّاسه بو طرزیله جواب اول کین شعار

هم قبیلم دور آنان سن قتله یتسن تا وارام

اوز قبیلم ایچره اولّام بو عملدن شرمسار

گئت گوتور قارداشلارون گَل ملحق اول بو لشکره

اول سپه سالار لشکر واردی سنده اقتدار

هر ریاست ایسته سن وار سویسن هر بیر منصب آل

سر سپه حتّی سنه اوز شغلون ایلر وا گذار

آلمیشام کتباً امیریمندن امان نامه سنه

یوخ تعرّض سیزلره گر اولسا هر شهر و دیار

تا ایشیتدی بو سوزی پور غیور مرتضی

تیتردی اعضاسی اولدی طبعینه چوخ ناگوار

سویلدی ای بی حیا دنیاده عار اولسون سنه

شرم ائدورسن اوز آنامدان ایتمیسن زهرادن عار

فاطمه اوغلون قویوم یالقوز گلوم سردار ئولوم؟

یوخ بو منصبده شرافت ، وار مذلّت زینهار

نه امان نامه نه منصب نه ریاست نه جلال

بیر گونوم اولسا حسین سیز عالم اولسون تار و مار

سن خیال ائتمه حسینه قارداشام سر لشکرم

بیر غلامم گر قبول ائتسه بو شاه تاجدار

طول وئرمه صحبته قورخار حسینون قیزلاری

خیمه لردن گورموسن زهرا قیزی زینب باخار

فکریمه بیر سوز گلور نوعاً چوخ استبعادی یوخ

تا خیمده بو خبر نشر اولدی تاپدی انتشار

شمر عبّاسیله میداندا ائدنده گفتگو

خیمه لرده زینبه یوز وئردی حال انکسار

یوز دوتوب درگاه حقّه یادگار فاطمه

عرض ائدوب ای دادگر ای مهربان پروردگار

قارداشیم عبّاسی آیا بس آنام امّ البنین

بسلموب اولسون حسینه بیر بئله موقعده یار

شمر آییرسا بیربیریندن بو ایکی قارداشیمی

وای منه اولّام یقیناً تا وارام دنیاده خوار

شمر گوردی ایلمز عبّاسه افسانه اثر

شاهباز اوج همّت کرکسه اولماز شکار

او قیتدی لشکره عبّاس خجلتدن ولی

شرم ائدردی بیرده سمت خیمیه ائتسون گذار

شه توجّه ائتدی لطفاً با وفا سردارینه

گوردی عبّاسه وئرور دنیای دون بی حد فشار

آز قالور ئولسون خجالتدن او غیرت معدنی

ایلدی احضار حضوره قیلدی رأفت بی شمار

هر سوزی گرچه امامون قولیجه اولماز دئماخ

وار ولی شهرت بو سوزده منده ائتمم استتار

ایتدی فرمایش ابوالفضله غریب کربلا

میلون اولسا گیتمگه قارداش واروندی اختیار

بولمورم بو سوز ابوالفضله نقدر ائتدی اثر

دوشدی توپراقه قدوم شاهه اولدی خاکسار

عرض ائدوب مولا قاپوندان قوما بیر عبدم ذلیل

اولماسام قابل ، قبول ایله واریمدی اعتذار

سیّدی سنسیز حیاتی نیلورم دنیاده من

خوش دگل سندن صورا عمر اولسا گیرم صدهزار

فرض ائله من بیر غلامم شاهزاده اکبره

تا ائدوم احراره بیله بندلیقدان افتخار

وئرماقا پایانه اوز پیمانیمی خوشخوانیله

ایسترم توفیق حقدن عهدیم اولسون استوار

خالقیم قیلسون عطا سالم بدن آسوده دل

دلنشین اولسون سوزوم چون شعر «شأنی»  آبدار

مایلم بیر اربعین اوچ اکبر آدلی نوحه خوان

اتّفاقیله نصیب اولسون او شش گوشه مزار

شاعر : مرحوم شانی

ye doost نظرات شنبه 10 شهریور 1397 ، 04:03 ب.ظ
جواب دادن حضرت ابوالفضل العباس (علیه السلام) به شمر لعین

یا شمر گلوبسن سالاسان شیری کمنده

وار بولموسن ایمان و ادب عاطفه منده

زهرا بالاسین بوشلاسین عباس وفادار

ائتسون اوزونی زادهٔ مرجانیه بنده

یا شمر حسین ابن علی نوکری یم من

مظلوم آقامین یاوری سر لشگری یم من

عباسم او مولایه نظر کرده غلامم

بیل حیدری یم حیدری یم حیدری یم من

یا شمر جهانین شرف ناسی منم من

ایستکلی باجیم زینبین عباسی منم من

چون حیدریم حیدریم حیدریم من

حیدر الینون خنجر الماسی منم من

یا شمر سپهر ادبین اختری یم من

گنجینهٔ فضل و شرفین گوهری یم من

سن سفرهٔ نامردده کاسه یالیانسان

من حیدریم حیدریم حیدری یم من

یا شمر علینون باغینون نوبری یم من

دین لشگرینون حمزه سیم جعفری یم من

بیر کلمیه دل آچما حضوریمده دایانما

من حیدریم حیدری یم  حیدری یم من

شاعر : استاد کریمی مراغه ای
ye doost نظرات شنبه 10 شهریور 1397 ، 03:53 ب.ظ
امان نامه

کوفه دن زیاد اوغلی گوندروب کربلایه بیر نامه یا حسین

قاردشیم ابولفضلی ایستوری عازم ایلسون شامه یا حسین

خیمه لر قباقینده شمردون گورنه نوعله ایلوری صدا

هاردادورباجیم اوغلی بس گلوب کوفه دن گلن نامه سین آلا

ایلیه یزید امرینی قبول تا حیاتی وار بی زوال اولا

قارداشیم ابوالفضله دی وره بیرجواب او ب نامه یاحسین

ایلدی حسینه بو سوز اثرسسلدی ابوالفضلی محضره

گیت بویوردی ای بدر کاملیم اول امیر وسالار لشکره

گرسن اولسان اولماز ایدن جفا بیر نفر عیال میگیره

نطقه گلدی سقای کربلا وار دیدی نه برنامه یاحسین

عرض ایدوب ایاشاه کربلاقارداشون اولاجانوا فدا

آشکارا ایله دلده مطلبون تا گوروم مرامون ندوراخا

دیموسان مگرقارداشوندان ای شهریارمن ایلوسن رها

قطعه قطعه اولسامدا گتمرم آند اولابوایفامه یاحسین

من بو دینی دنیایه ساتمارام محکم ایلرم دین پایه سین

ورمرم الیمدن بو منصبی حق ایده منه قطع سایه سین

رد ایده جوابین ویا سالانطقدان بیانین او آنیده

گستره حسینه وفاسینی سیر ایده اوهنگامه یا حسین

شاعر : امینی خویی
ye doost نظرات شنبه 10 شهریور 1397 ، 03:25 ب.ظ
احوالات امان نامه و شجاعت حضرت ابوالفضل (علیه السلام)

گلمیشم سیزدن بو صحراده حمایت ایلییم

مظهر   قدرت   یزیده   اخذ  بیعت  ایلییم

سیزلره منصب ویروب صاحب جلالت ایلییم

غیرت و وجدانی هم بی جا مرامی بوشلیون

صاحب اجلال اولون تشنه امامی بوشلیون

تا او نادان صوتینی درک ایله دی سقای دین

بیر سویوخ تر شرمیدن دوتدی منور صورتین

تا بو جریانی اشیتدی سرور خلد برین

محضر والاسینه عباسی دعوت ایله دی

حیدری لحنیلن اول شیری نصیحت ایله دی

امر ایدوب  گیت  تلین  اوسته  ویر قولاق  گفتارینه

گر صلاحون اولسا  ویر بیعت  الین  سالارینه

راضی اولما پیکرون قارداش بویانسین ثارینه

آلدی رخصت  محضر سالاریدن  سردار  عشق

تلین اوسته عازم اولدی غیضیلن رخسار عشق

کیم گوروب وقرین دیدی تل اوسته  شیر  نر گلور

یا کی قافی ترک ایدوب عنقای زیبا پر گلور

مرحبی    ئولدورمگه   یا  فاتح  خیبر  گلور

هیبت عباسی گورجک شمر بیلدی مطلبی

بیلدی بیر دنیایه ویرمز تار موی زینبی

گورجگین  اول  ابلهی  پور غیور  مرتضا

سسلدی ای پست و انتر کاسه لیس بی حیا

سن ندن باعث اولوبسان آل حیدر قو رخوشا

اذنیم اولسیدی سالاردیم جسمووی بیر حالته

شیریلر  گورسیدی  اندامون  دوشردی وحشته

من  علینون  اوغلیام  ام البنینه  دلبرم

لشکریم یتمیش نفردور لشکره سر لشکرم

عالمین سلطانی اولسامدا  حسینه  نوکرم

دست بیعت بو جهانداهر پلیده ویرمرم

اصغرون بند قماتین مین یزیده ویرمرم

سرور و شاهیم حسیندور عشقیمه سلطان حسین

روحیمه ریحان حسیندور دردیمه درمان حسین

قان  دیور  رگلرده هردم  آدووه  قربان  حسین

مکتب عشاقیده شوری حسیندن آلمیشام

بدر  آل  هاشمم  نوری  حسیندن آلمیشام

شاعر : کربلایی نوید آسال اردبیلی
ye doost نظرات پنجشنبه 8 شهریور 1397 ، 12:48 ق.ظ
احوالات قتلگاه

زینب عقیله، بنت شهنشاه قل کفی

ماه حجاز و شیرزن دشت کربلا

ترک ایتدی پاس خیمه نی طغیان عشقده

گلدی دایاندی محضر سلطان عشقده

توپراقلار اوسته گوردی شه کربلا یاتوب

قان بسترینده سینه ده سانسیز یارا یاتوب

عالم باتوبدی ظلمته نصف النهارده

عزلتگه غروبده شمس الضحا یاتوب

سوز جگرله توپراقی تل رماد ایدوب

خاکستر ایچره آیینه حق نما یاتوب

گودالی آشیانه وحدت بولوب، اودور

تیر جفائیله پر آچان بیر هما یاتوب

سینایه رشک، مصرعی غرق سنا اولوب

چون اوندا عکس جلوه حسن خدا یاتوب

وار ایله لطفی پیکرینین، هر گورن دییر

مین گلستان طراوت و ذوق و صفا یاتوب

مهد زمین عجبدی تاپوب حالت سکون

اوندا یارالی حجت رب السما یاتوب

خورشدور ز بسکه حالنه بولمز نظاره گر

مدهوش جلوه رخ جاناندی یا یاتوب

جای عجبدی گر چه یاتوب بیر وجوددن

باشدا بدنده هر بیری اما سوا یاتوب

بالین ایدوب جدا باشنی باشی، پیکری

قان بسترینده سینه ده سانسیز یارا یاتوب

یاتماز لواسی قائم اولان شاه جنگده

شه کیم یاتوب بو نوعله، قطعاً لوا یاتوب

بیداد خصمدندی ایدوب عزلت اختیار

صدر رقیم قربده کهف الورا یاتوب

رنجور اولوب معارک هیجاده قلبدن

اما تاپوبدی خاتمه چون ماجرا، یاتوب

فلک نجاتی موج حوادث، ایدوب شکست

گرداب خون ایچنده اودور ناخدا یاتوب

حیراندی کاروان نظامات کاینات

آری منام مرگده چون رهنما یاتوب

رنگ شفق جهانه سپر، قانلی جلوه سی

گر چه فراش خسفده بدرالدجا یاتوب

وارونه نقش اولوب یره توحید هیکلی

مکبوب حالیله شه گلگون قبا یاتوب

موقوفدی قیام شرایع، قیامنه

تعطیل اولوب مدارس آیات، تا یاتوب

شاعر : مرحوم استاد محمد عابد
ye doost نظرات پنجشنبه 8 شهریور 1397 ، 12:21 ق.ظ
زبانحال حضرت زینب کبری (سلام الله) در قتلگاه

باجون گر چه جفای دهریدن دلتنگ دور قارداش

دایانام اعتراض ایتماق مریده ننگ دور قارداش

قوپوپ طوفان محنت فکری وار صبریم ایوین یخسون

ولی من قویمارام غم منجنیقی قلبیمی سیخسون

بو مکتبدن گرک شاگرد اول زینبون چیخسون

حوادث لرده دوزماق بیزلره فرهنگ دور قارداش

گرک پابند اولا عشق اهلی اوز عشقینده میثاقه

ویرا صبرین لواسین همتیله عرش نه طاقه

مگرهموار اولار عشقین یولی عالمده عشاقه

بو یول غمدور بلادور فتنه دور نیرنگ دور قارداش

قسم اولسون بو جسم اطهره فریاد ایتامه

یزیدی قویمارام اوز شوم طرحینده یته کامه

لوای فتحی ویرام قدرتیله کوفه و شامه

که زینب فاتح فتح الفتوح جنگ دور قارداش

بیله فکر ایلوری هند اوغلی من قول باغلی نخجیرم

اسیرم یالقوزام قارداشسیزام، افتادیم پیرم

او روبه بولموری من شیر زادم دختر شیرم

بو قیزلاردا منه هر تک تکی بیر هنگ دور قارداش

سینق محملده اطرافه ییغوب جمع پریشانی

سالوب نظمه قیامه ایلرم آماده نسوانی

آخان دین اوسته ناحق کربلا دشتینده کی قانی

اوزوم آلام بو محمل زینبه اورنگ دور قارداش

نه قدری گوز باخور دشت بلایه گلدی گلشندی

ریاض عشقدور هر بیر یری نسرین و سوسن دور

سنون گول جسمیوین اطرافی اما غملی خرمن دور

قلجدور، نیزه دور قانه بویانمیش سنگیدور قارداش

نوای ناله بلبل لروندن گلستان آغلور

یانور سرو صنوبرلر بو غمده باغبان آغلور

آچوب باش یاسمن نسرین و یاس و ارغوان آغلور

جرس فریاد ایدور هر ناله بیر آهنگ دور قارداش

بزنمیش بو داغلمیش گللریله کربلا یکسر

آچوب بعضی مثال لاله بعضی مثل نیلوفر

بو گلشندن سمایه اوج ایدور عطر گل حیدر

غریبه گللرون گلشنده رنگا رنگ دور قارداش

مشام جانه قارداش بو مکاندا عطر جنت وار

دیمم عطر جنان جنتده هاردا بیله نکهت وار

کنارینده ولی بو گللرین بیر سرو و قامت وار

یقین بو هیبتیندن سر سپاه جنگ دور قارداش

بو هیبت بو صلابت بولمورم قارداش نه علتدور

اولوب پژمرده حالت گوسترور رنگی خجالتدور

ویروب سو وعده سی شرمنده آل رسالتدور

اودور آیینه ایفای عهدی زنگ دور قارداش

بو درگاهون سیه رو نوکری ((اصلی))شرمنده

بیزه بیر یوزلی نوکردی خدایه شکر ایدن بنده

آنام زهرایه خاطر قویما اولسون چوخ سرافکنده

الیندن دوت گیلن ایش باره سیندن لنگدور قارداش

شاعر : حاج عبدالله اصلی
ye doost نظرات چهارشنبه 7 شهریور 1397 ، 03:57 ب.ظ
شجاعت حضرت علی اکبر (علیه السلام)

سبک : از صلابت ارتش و ملت و سپاه ما

اکبرم قوشون من حسینون دلاور اوغلویام

وار الیمده تدبیر جنگیم هنرور اوغلیام

گلسه گلسین هر کسین هوای رزمی وار

شاهزاده اکبرین جهاده عزمی وار

یارب یارب – مدد مدد – یارب یارب

شاهزادیم – واردی عزتیم

بئله خنجریم – الده قدرتیم

شبیه پیغمبر اطهرم

جدلده یادآور حیدرم

یارب یارب – مدد مدد – یارب یارب

ای امامینه بیعت نامه سین یازان قوشون

امتحان گونونده همان بیعتی پوزان قوشون

اف اولا بو غیرت و وفای عهدیزه

درس عبرت ایندی بو جوان وئرر سیزه

یارب یارب – مدد مدد – یارب یارب

کوفیان سیزین ننگ آدیزدا وار

شاه لافتی گر یادیزدا وار

توکولدی قانی اونون سجده ده

حسینی تک قویموسوز عرصه ده

یارب یارب – مدد مدد – یارب یارب

من گرک بوگون دینیمه دِینیمی ادا ائدم

یاحسین دیوب عرصه ده قانه غرق اولام گیدم

من حسینون ارشد اوغلی یار رهبرم

ظلم و جوره گر گر ئولم گینه باش اگمرم

یارب یارب – مدد مدد – یارب یارب

اکبرم فدا راه اکبره

نام حیدره شاه خیبره

مدافع و یار قرآن منم

مجاهد راه ایمان منم

یارب یارب – مدد مدد – یارب یارب

شاعر : عباسی معروفان
ye doost نظرات چهارشنبه 7 شهریور 1397 ، 03:52 ب.ظ
بهاریه گریز به روضۀ حضرت علی اکبر (علیه السلام)

بهار اولدی گوروندی آیت توحید دنیاده

سالندی گلستانه بر زمرّد رنگ سجّاده

اولان سرگرم وحدت معتکف کاشانۀ غمده

دولانسون گلشنی باخسون قد دلجوی شمشاده

تفکّر ایلسون تغییر فصل و وضع گلزاری

ندور علّت گیدور آز وقتده وضع چمن باده

ایدوب گلده عجب اظهار قدرت خالق یکتا

هویدا ذات مکنونی ایدوب هر چشم بیناده

نه یالقوز گل نه تک سنبل نباتات چمن یکسر

باخاندا وَحدَهُ وَحدَه دیر ظاهرده معناده

گل سرخ اوسته نقّاش حقیقی گوستروب قدرت

آچوبدور باب توحیده اونون هر برگی مینجاده

ویروب صبّاغ حکمت هر گله بیر نقش رنگارنگ

طبیعی آنلاسون وار مقتدر خالق بو دنیاده

شقایق اشرفی رعنا حنائی یاسمن صد برگ

دِیَر اوز رنگ بوینده نه قدرت واردی یکتاده

گل بید و بنفشه نرگس و اژدر دهن سوسن

ایدر اثبات توحیدی سمن تک لفظ و معناده

مرتّب بر بساط جشن گلشنده اولوب برپا

مُبرهن گورسنور بر موجدقادر وار اخفاده

وجوده موجده هر شیئی بر برهان انّی دور

هواده طیر و وحشی چولده ماهی قعر دریاده

نسیم صبح اولوب ساقی پیاله لاله می شبنم

او بزم عیشده شوریده بلبل نوش ایدر باده

خمار عشق ایدوبدور عندلیبی نرگس مخمور

یاتار گه شاخۀ گلده قونار گه سرو آزاده

گُله وار عشقی دلدن جور و طعن خاره تاب ایلر

سالار یاده خزان فصلین وورار جه جه گلور داده

غم هجره دوزوبدور دامن وصله وروبدور چنگ

اوخور درس وفا گلدوقجه شاخ گلده فریاده

اگر چه موسم عیش و فرح دور فصل گل امّا

منیم قلبیم آچلمور قید غمدن اولمور آزاده

گریز

خیالیم نه چمن نه عشق گل نه ذوق بلبلدور

دیار کربلاده سالموشام بر نوگلی یاده

نجه گل عارضی رشگ گل و گلزار جنّتدور

قد موزونی قویموش داغ حسرت قلب طوباده

بشر صورت ملک طلعت اوزی تصویر پیغمبر

آدی اکبردی گلمز گلمیوب مانندی ایجاده

یوزی گل زلفی سنبل بینوا لیلا اونا بلبل

باخار آغلار یانار شوریده بلبل تک او صحراده

هوائین ایسّسی سوز عطش ایلوب یوزین گلگون

قویار طاقت نجه او حُسنِ روز افزونی لیلاده

قرا زُلف آق کفن رخسار گلگون قامت موزون

سالوب سرو آتدا گویا سایه سنبل برگ رعناده

ایدوب اوز زلفی تک مجنون کیمی لیلانی آشفته

ورُوبدور بوینونا هر تار مو بر سخت قلّاده

باخان سویلر گل لیلا چکوب نقّاش غم تصویر

بو لیلادور هانی روحی یقین صورتدی دیباده

ویرور اولقالب بیروحه دو هردم مسیحا دم

جگر قان اولماقین توضیح ایدور گوز اشگ حمراده

دیور ایلوب علی بو قاره زلفون بختیمی قاره

گرک آشفته زلفون تک قالام عمریمجه افتاده

بو نه قامتدی لیلایه قیامنده قیامتدور

گورونمز لیلیه بیله قیامت حشر عظماده

غزال مشگمو آهو باخیشلی گوزلریم نوری

حرم آهوسی تک دوشسن بوگون سن دام صیّاده

دوشر صحرالره لیلا مَلَر آغلار یولار گیسو

باخاندا حالینه آغلار یانار اعلاده ادناده

دِیَنده وای علی اکبر جوانیم وای اوغول ایوای

منیله سس سسه زهرا ویرر جنّات اعلاده

آلوبدور شاهد غیبی سنون آرامیوی اَلدن

اودور جان ویرماقا دلدن اولوبسان بیله آماده

منه چوخ باخما یانما ای گوزوم نوری گیدورسن گیت

یانوب یاندیرما لیلانی شرار آهه شهزاده

اوزون راضی آتان راضی رضایم منده بو حاله

اگر چه طاقتیم یوخ قان گورم بو چشم شهلاده

رضایم پیکرون اولسون گل صد برگ تک صد چاک

بو چشم نرگسون قانیله دولسون دشت هیجاده

دوزولسون شدّۀ مرجان کیمی قان تار زلفونده

باخان رحم ایلسون گرچه مروّت یوخدی اعداده

بو کوی عشقده باش ویر آناوی سرفراز ایله

قیام حشردور باخما خیام آل طاهاده

ترقّی عالمین سیر ایت اوجات احکام اسلامی

گیدنده نیزه ده شامه گلر آردونجا لیلاده

جدا باشندا تبلیغات اسلام ایله سن سنده

دیار شامده محملده بانگ وا علیّاده

گلنده قتلگاهه دست بسته پیکرون اوسته

کسنده باشوی عجز ایلرم بیرحم جلّاده

وُراندا باشیمه قمچی منه بیر دادخواه اولماز

کیمی سسلر اوغولسوز لار بلا وقتینده امداده

«حسینی» معدن جود و کرمدور بو علی اکبر

ویرر عالی جزا یوم الجزا مطلق بو افراده

شاعر : مرحوم استاد حسین سعدی زمان

تصاویر برگزیده

راست
چپ